Пратениците на ДПМНЕ и Левица не гласаа во Собранието за новиот Закон за употреба на македонскиот јазик. ДПМНЕ и Левица покажаа негрижа и непочитување за македонскиот јазик, како столб на македонскиот идентитет. Врв на срамот за една партија е да не поддржи ниту една одлука за македонскиот јазик рече на прес конференција портпаролот и пратеник на СДСМ Дарко Каевски.
– Христијан Мицкоски и ДПМНЕ досега немаат направено ништо за македонскиот јазик, немаат направено ништо за македонскиот идентитет. Тоа се истите оние од ДПМНЕ кои ширеа лаги за бугаризација и асимилација, а не гласаа за македонски јазик во македонското Собрание. Истите оние кои го нарекуваа Блаже Конески „џуџето од Небрегово“. Тоа се најголемите штетници за државата. Со Законот за македонски јазик се обезбедува дополнителна заштита, унапредување и збогатување на македонскиот јазик. Се прошируваат областите за употребата на македонскиот јазик и неговото кирилско писмо, како и опсегот на лекторирање. Еден од новитетите во законското решение е создавање Инспекторат за употреба на јазикот, но и дополнително изучување и афирмација на јазикот во странство, вели Каевски.