Вработените на ЈСП ќе добијат плата. Советот на Скопје изгласа пренамена на 133 милиони денари од буџетот на Градот со намена со нив да се исплатат плати во ЈСП. Советниците и денешната седница ја почнаа со политички препукувања поради кои двапати ги предупреди претседателот на Сојузот на синдикати на Македонија, Дарко Димовски кој ја следеше седницата како јавност.
„Ве молам изгласајте ја одлуката па подоцна објаснувајте се, втората смена во ЈСП чека на гласањето за да почне да вози”, предупреди Димовски.
Кусо по второто предупредување Советот ја изгласа одлуката за пренамена на средствата. Вработените во ЈСП платата ќе ја добијат утре.