Државниот јавен обвинител, Љубомир Јовески, денеска ѝ го делегирал предметот „Талир 2“ на обвинителката Ленче Ристоска од СЈО, дознава „А1он“. Ова уследи откако вчера беше делегиран и предметот „Монструм“ на обвинителите Гаврил Бубевски и Фатиме Фетаи. Се очекува до крајот на неделата да бидат им бидат делегирани и останатите предмети на обвинителите од СЈО кои ги застапуваат пред судовите.
Судијката Даниела Алексовска-Стојановска го одложи првото рочиште за предметот „Талир 2“ зашто не дојдоа ниту адвокатите на Никола Груевски и на Кирил Божиновски, ниту обвинетиот Божиновски, а немаше ниту обвинител од СЈО.
Адвокатите го известиле судот дека се спречени да присуствуваат на рочиштето поради присуство на друго рочиште, а некои од нив биле во странство.
Во „Талир 2“ обвинети се Никола Груевски, кој е во бегство и има азил во Унгарија, и поранешниот генерален секретар на Владата Кирил Божиновски. Според обвинението, тие ја злоупотреиле службената положба и му овозможиле на ДГ „Бетон“ АД Скопје да го изгради седиштето на политичката партија ВМРО-ДПМНЕ, во времето кога фирмата имала склучено договори за јавни набавки со државни органи и јавни установи или претпријатија, спротивно на Законот за политички партии, Законот за финансирање на политички партии и Законот за облигациони односи.
Пред судот се води друга постапка за предметот „Талир“ за незаконско финансирање на партијата ВМРО-ДПМНЕ. Обвинетите во „Талир“, според обвинението, незаконски добиле најмалку 4,6 милиони евра за партијата, а потоа организирале тие пари да бидат уплатени на жиро-сметката на партијата преку уплатници на разни луѓе.