Jавна опомена за пратениците кои го предизвикаа и учествуваа во вчерашниот инцидент на седницата на Комисијата за финансирање и буџет, е донесена денеска на ад-хок кооринацијата кај претседателот на Собранието на Македонија Трајко Вељаноски.
Оваа мерка во врска со физичката пресметка меѓу пратеници од ДУИ и ДПА, како што соопшти Вељаноски на почетокот на 12. пленарна седница, е донесена врз основа на член 43 став 4 од Законот за Собрание.
– Како пратеник, како претседател на Собранието на Република Македонија, а пред се како човек не можам да го прифатам насилството како начин за решавање на политичките или програмските расправи. Мислам дека само со заемно почитување и толеранција можеме да создадеме многу повисока политичка култура која ќе се темели врз принципите на демократијата дефинирана со онаа позната мисла на Волтер, рече Вељаноски.
Тој апелира до пратениците дека само преку почитување на културата на дијалог и моќта на аргументите може најдобро и најефикасно да се артикулираат интересите и потребите на избирачите кои им го доделиле мандатот.
На денешната собраниска седница не присуствуваат пратениците на ДПА, кои по инцидентот соопштија дека се повлекуваат од работата на Собранието.
