ВМРО-ДПМНЕ одбра борба против неодговорната влада, рече генералниот секретар на партијата, Игор Јанушев на прес-конференција.
Тој обвини дека структури на власта и нивните соработници вршеле силен притисок врз пратеници од ВМРО-ДПМНЕ.
– Собранието стана пазар и арена за уцени. Се апсат поради политички прогон и тргуваат со слободата. Ветуваат награди за послушните и ги заплашуваат семејствата на пратениците за да гласаат, вели Јанушев.
Како што кажа тој, на еден пратеник му биле понудени милион евра за да глас, на друг 250 илјади евра, а на трет 2 милиони евра. Јанушев рече дека тие понуди биле одбиени и запраша дали и премиерот Заев учествувал во овие понуди.
– Свесни ли сте во каков амбис ја водите државата? Ова е преседенан. Не е ова за европска Македонија, ова е диктатура и насилие, рече Јанушев и додаде оти им оддава признание на пратениците од ВМРО-ДПМНЕ кои не потклекнале пред понудите.
Тој не сакаше да открие на кои пратеници им биле нудени сумите и остави тоа да го истражи обвинителството.
Јанушев изјави дека немал информации дали некои од пратениците од коалицијата на ВМРО-ДПМНЕ ќе гласаат за уставните измени и најави оти ќе присуствуваат на седницата, која што е закажана за 21 часот.
Галена Николовска-Ризвановиќ