Кабинетот на Претседателот на Република Македонија, во врска со изнесувањето информации од страна на претседателот на политичката партија СДСМ, Зоран Заев од одржаната седница на Советот за безбедност, излезе со реакција во која во порачува дека во вакви исклучително чувствителни моменти, неопходно е одговорно однесување од сите.
„Господинот Зоран Заев, како претседател на политичката партија СДСМ беше повикан од страна на претседателот на Република Македонија, Ѓорге Иванов да присуствува на седницата на Советот за безбедност, со цел да биде информиран за деталите и преземените дејствија во акцијата во Куманово, како и за безбедносната состојба на државата. За Зоран Заев е покренато обвинение за случајот „Пуч“. Македонскиот претседател, почитувајќи ја пресумпцијата на невиност, а водејќи се од државните интереси одлучи да го повика Заев да присуствува на седницата на Советот за безбедност“, се вели во реакцијата од кабинетот на Иванов.
Од таму додаваат дека Заев, согласно деловникот за работа на Советот за безбедност, потпишал изјава која го обврза да не изнесува какви било информации од одржаната седница.