Претседателот на Република Македонија, Ѓорге Иванов, по повод 28 Септември, Меѓународниот ден на Бошњаците, упати честитка до припадниците на бошњачката заедница во земјава.
„Дозволете да ви го честитам 28 Септември, Меѓународниот ден на Бошњаците, и да ви посакам добро здравје, успех и благосостојба. Празнувањето на 28 Септември – Меѓународниот ден на Бошњаците е симбол на длабока почит што Република Македонија ја има кон сите своите граѓани“, се наведува во честитката на Иванов.
Себеидентификацијата претставува основно, загарантирано и неотповикливо човеково право кое е столбот на кој се темели нашата заедничка држава, се додава во соопштението.
„Негувањето на културните различности и традиции е всаденo во кодот на Република Македонија. Принципите на меѓусебна почит, заедништво и разбирање се вредности кои сите ги споделуваме и благодарение на нив успешно градиме иднина која ја посакуваме за себе и за своите деца“, вели Иванов во својата честитка до бошњачката заедница во Македонија.
Шефот на државата посочува бошњачката заедница дава огромен културен и економски придонес во развојот на демократска, развиена и модерна Република Македонија.