Поранешниот пратеник во Собранието од редовите на ВМРО-ДПМНЕ Илија Димовски смета дека тоа што Владата сака преговарачката рамка да ја усвои Собранието е само барање за поголем легимитет кое понатаму ќе направи поголеми проблеми при донесувањето на секоја одлука.
– Владата треба да ја усвои преговарачката рамка, а не Собранието. Тоа што сакаат предлогот во пакет со протоколот да се разгледа на пленарна седница што побрзо може да биде барање за легитимитет, за избегнување одговорност и добивање поголема поддршка пред да го прифатат францускиот предлог – вели Димовски за „А1он“.
Бившиот пратеник на ВМРО-ДПМНЕ вели дека формално-правно предлогот може да се истурка затоа што нема да се земе предвид масовната поддршка на народот кој очигледно не се согласува некој да преговара за неговиот идентитет и историја.
Димовски е убеден дека нашата дипломатија целосно потфрлила во односите со Бугарија и дозволила темата за македонскиот идентитет да се претвори во тема за човекови права.
– Нè надиграа дипломатски со резултат 100:0 затоа што нашата дипломатија е загубена во вселената. Пред една година никој не сакаше да ги слуша бугарските услови во Европската Унија, а сега одеднаш станаа европски. Билатералниот протокол содржи сè и сешто, таму ќе се разговара за историја, учебници и јазик. Огромен проблем е што во преговарачката рамка Бугарија нема стриктна обврска да не нè спречува во преговорите, туку ќе го користи член 5 како инструмент да надгледува што ние ќе спроведуваме од протоколот – објасни тој.
Димовски неколку месеци наназад е на став дека ние треба да ги запреме преговорите со Бугарија и проблемот да се ескалира на дипломатско ниво.
– Ние треба да одбиеме каков било разговор за историјата, јазикот, нашите основни човекови права и да го ескалираме проблемот како што тоа го направи Бугарија во последните неколку месеци. Ќе има негативен ефект на краток рок и ќе ги наруши односите со Бугарија, но тие и така не се добри. Сметам дека ќе добиеме разбирање од меѓународната заедница ако сме истрајни – рече Димовски.
Тој додаде сите седум нормативни точки на Резолуцијата на Собранието ќе бидат прекршени доколку Владата донесе одлука за прифаќање на францускиот предлог, а непочитувањето на одлука на Собрание ќе биде безвластие и рушење на уставниот поредок.