Граѓанските активисти од иницијативата „Зелен хуман град“ во отворено писмо бараат од претседателот на државата Стево Пендаровски да не го потпише указот за најавуваните измени на Изборниот законик, кои според нив, освен на Уставот и домашните закони, се спротивни и на добрите меѓународни практики, поконкретно на препораките од Венецијанската комисија и ОБСЕ/ОДИХР.
„Со воведувањето на минимален праг од 2% од запишаните избирачи за независните листи да добијат право да се кандидираат на претстојните локални избори, големите партии воведуваат диктатура на партизмот и брутална окупација на политичкиот простор која е карактеристична само за режимски земји, а не за демократии. Притоа, тие целосно ги исклучуваат граѓаните и, спротивно на Уставот и законите, ги попречуваат да се кандидираат за јавни функции. Прагот од 2% за Град Скопје би значел обезбедување на 10.000 потписи наместо досегашните 1.000, исклучиво во подрачни канцеларии на ДИК, во работно време и во ек на летни одмори“, велат од „Зелен хуман град“, нагласувајќи дека членот 62 од Изборниот законик не е ниту еднаш менуван од денот на влегување во сила во 2006 г., односно 15 години.
„Од вас бараме да не дозволите газење на демократијата, да не дозволите дискриминација на граѓаните и да не дозволите компромитирано политичко малцинство (партиите се гласани од 30-40% од вкупниот број на избирачи), да одлучуваат за независни граѓански кандидати“, се вели во писмото до Пендаровски, во кое се наведени сите аргументи за позицијата на „Зелен хуман град“.