Граѓаните се најзадоволни од услугите на Централниот регистар, а најмалку од услугите на Фондот за здравствено осигурување. Односот на шалтерските работници е најдобар во Агенцијата за катастар, помалку во Агенцијата за вработување и Царинската управа. Во Централниот регистар најмалку се чека ред и најподобрено е работењето.
Ова се резултатите од проектот „Таен клиент“ што го спроведе Министерството за информатичко општество и администрација во периодот мај-јуни 2013. Направени се 2.700 анкети во десет подрачни единици на вкупно девет институции од кои граѓаните најчесто бараат услуги, 540 ненадејни посети од најмени агенти кои се претставувале како директни корисници, како и по три телефонски повици во секоја институција.
Според анализата, граѓаните се генерално задоволни од услугите на администрацијата, но планираните реформи за поефикасно функционирање мора да се спроведат.
– Подолго чекање ред пред шалтерите, телефонски нејавувања од страна на операторите, недоволно хигиена и неприлагодена температура во просториите се само некои од детектираните слабости поради кои одредени институции треба да го реорганизираат работењето, рече денеска министерот Иво Ивановски.
Презентирајќи ги резултатите од спроведената анализа, Ивановски нагласи дека во речиси сите институции граѓаните ја добиваат услугата на првата врата без да бидат препраќани на друго место или шалтер.
– Ова истражување е во рамки на проектот за реформи во јавната администрација кој треба да покаже какви се услугите на институциите кон граѓаните, истакна министерот.
За четири недели, додаде, државните институции кај кои беа утврдени слабости ќе треба да направат акциски план за нивно надминување. По шест месеци проектот ќе биде повторно спроведен за да се види дали има промени во работењето.