Градоначалникот на општина Струмица, Зоран Заев, попладнево, ги прими струмичките одбојкарски репрезентативци кои беа дел од одбојкарската репрезентација на Македонија, а по повод освоеното второ место во Европската лига.
-Огромна е среќата која што на сите граѓани на Македонија ни ја подари македонската одбојкарска репрезентација во Полска, а секако за нас струмичани е уште поголема затоа што осум одбојкари во репрезентацијата се од Струмица, тоа за нас е посебна гордост. Клубот од Струмица оваа година ја има двојната титула, ние сме шампиони во одбојка, го освоивме и купот, но еве и нашето учество во репрезентацијата предизвикува дополнителна гордост.
Денеска, имавме чест со дел од репрезентацијата, со нашите струмичани, да ја испратиме пораката дека е вредно да се помага и финансира овој значаен спорт и тоа до сите политичари, до власта, општините, но и приватниот сектор, посебно за идните чекори кои што се пред нив, а се многу важни и таа среќа која не огреа нека биде дополнителна причина за сите да насочат и внимание, финансии и ресурси за поддршка на овој спорт.
Јас сум убеден дека квалитетот на нашата репрезентација многукратно ќе ја оправда помошта за да напредуваме понатаму и во афирмацијата на одбојката, а со тоа и во афирмацијата на нашата Македонија. Општина Струмица со поддршката која што ја дава од својот буџет е присутна во одржувањето на квалитетот на одбојката. Општината помагајќи 48 клубови од програмата за спорт ќе ја продолжи поддршката и се радуваме како мали деца кога доаѓаат круните, овие денови ја исплативме и наградата од 5 илјади евра за освоената титула и на тој начин сакаме да поттикнеме борба за шампионски титули и за освојување на купот и во тоа име, јас и како политичар, можам да испратам порака до централната власт која што по дифолт треба да ги поддржува репрезентациите, да се изнајдат финансиски средства, затоа што еве, нашите играчи кажуваат дека ние имаме квалитет и за учество во светската лига, не смеат парите да бидат проблем за учество, а со тоа и за афирмација на Република Македонија преку спортот, кој е најголемиот амбасадор на државата, рече градоначалникот Заев.
Од името на одбојкарите за приемот на градоначалникот се заблагодари капитенот Никола Ѓоргиев.
-Два дена по нашето финале, по една од најголемата битка која ја имавме во животот, дојдовме дома во Струмица и сакаме да му заблагодариме на градоначалникот Зоран Заев, кој ни приреди еден свечен чин и тоа не само на нас струмичани, туку и на цела репрезентација, но останатите поради умор и ангажман во клубовите не се во можност да бидат во Струмица. Сите ние сакаме да се заблагодариме на градоначалникот за поддршката која ни ја даваше, а посебно ние струмичани за поддршката на клубот ОК Струмица во сите овие години и веќе три години двојна круна. Ова за нас беа најсреќните денови во нашите животи, успеавме да го направиме сонот реалност, успеавме да го земеме овој сребрен медалм кој ни значи многу и кој е доказ за нашата работа и посветеност и најбитно е што во Струмица се игра добра одбојка и дека во Макеоднија одбојката е еден од најголемите спортови и дека овој спорт треба да се помога и одбојката да биде на исто рамниште како ракометот и кошарката, рече Ѓоргиев.
Во знак на благодарност за приемот, но и за континуираната поддршка, капитенот Ѓоргиев му го подари сопствениот дрес на градоначалникот Зоран Заев.