Градоначалникот на Град Скопје, Коце Трајановски и официјална делегеција на Советот на Град Скопје, денеска по повод 11 Октомври – почетокот на антифашистичкото востание и НОВ, положија цвеќе пред споменикот на паднатите борци на Градските гробишта во Бутел, на гробот на Михајло Апостолски во Бутел, на гробот на поранешниот претседател на Република Македонија, Киро Глигоров, на гробот на поранешниот претседател на Република Македонија, Борис Трајковски, пред споменикот на Методија Антонов-Ченто на Плоштадот Македонија во Скопје и на споменикот на „Паднатите херои“ во паркот Жена-Борец.
На 11 Октомври 1941 борците од Првиот прилепски партизански одред го нападнаа бугарскиот полициски участок и телефонско-телеграфската мрежа во Прилеп, што го означи почетокот на организираното востание на македонскиот народ против бугарскиот, италијанскиот и германскиот окупатор за ослободување на земјата. Следниот ден, на 12 октомври, се огласија и партизаните од Кумановскиот одред.
Со одлуката да пристапи кон антифашистичката коалиција Македонија застана на страната на прогресивното човештво, а против фашизмот како најтемна идеологија од современата историја и најсилна негација на општоцивилизациските и демократски вредности. Македонскиот народ самостојно се избори за својата слобода.
Од првите партизански одреди кои ја почнаа борбата, Народноослободителната војска на Македонија на крајот од четиригодишната војна прерасна во доброорганизирана 110-илјадна армија со воени формации од највиок ранг како корпуси и дивизии.