Суспендирањето на слободниот визен режим за Македонија е сеуште актуелен, иако бројот на македонски баратели на азил во Германија е намален, јавува радиото Дојче Веле на македоснки јазик.
Укинувањето на слободното движење во Европа поради стотината сиромашни луѓе од Македонија кои бараат подобар живот во Германија го сметам за – авантуристички.
Алармот на министерот Фридрих го гледам само како тема која е во контекст на престојните избори. Но, до толку повеќе е загрижувачки ако се знае дека германското МВР заедно со министерствата на Австрија, Холандија и Велика Британија со писмо испратено до претседателството на Европскиот Совет бараат нова дискусија за еднострана суспензија на слободниот визен режим за Македонија и Балканот – изјавил за радиото Мемет Килич, пратеник од сојузот 90-зелени во германскиот Бундестаг.
Писмото кое е потпишано од министерот Фридрих и неговите ресорни колеги од Австрија, Холандија и Велика Британија, до Даблин било испратено на 25 април, само шест дена по неформалната дискусија за истата тема во Бундестагот.
Инаку, од последните податоци за бројот на баратели на азил од Македонија, кои за Дојче Веле ги достави германското сојузно МВР, се гледа дека состојбата е релаксирана.
Бранот е намален од ноември 2012, заклучно до април годинава. Кулминацијата, инаку, била во есенските месеци(август, септември и октомври).