Денеска се одржа средба меѓу лидерот на СДСМ Зоран Заев и премиерот Никола Груевски во Клубот на пратеници, место кое го одбра Заев како неутрален терен за преговори за излез од политичката криза.
Во Клубот на пратеници беа присутни Мартин Протуѓер, Илија Димовски и Петре Шилегов, меѓутоа, за разлика од претходните средби оваа се одвиваше само меѓу двајцата лидери.
До лидерската средба дојде по поднесените оставки на опозицијата во Собранието и непризнавањето на изборните резултати на предвремените парламентарни и претседателски избори.
Изминатите денови Заев најави дека ќе му достави пет барања на Груевски. Клучното барање е формирање техничка влада што ќе спроведе слободни, фер и демократски избори. Останатите се однесуваат на одвојување на партијата од државата, регулација на медиумите и правична застапеност на опозицијата на јавниот сервис МРТВ и на останатите медиуми, допрецизирања во изборното законодавство и прецизирање на Избирачкиот список и спроведување попис на населението.
За Груевски, формирање на техничка влада не претставува излез од политичката криза.
Денешното седнување на заедничка маса најверојатно ќе биде една од серијата средби што ќе се случуваат на лидерско ниво, на кои ќе се утврди во која насока ќе течат разговорите.
Петар Клинчарски