Голем број новинари, сниматели и фоторепортери веќе неколку часа се пред затворот во Шуто Оризари и чекаат поранешниот премиер Никола Груевски да се пријави за отслужување на двегодишната затворска казна.
Неизвесно е дали Груевски ќе се појави вечерва, иако по решението на Кривичниот совет кој ја одби жалбата од адвокатите на екслидерот на ВМРО-ДПМНЕ, исцрпени се сите мерки за одложување на издржувањето на затворската казна.
Груевски се жалеше и до Врховниот суд поради пресудата за случајот „Тенк“, но решението од таму не се очекува во скоро време. Жалбата до Врховен не го одложува извршувањето на одлуката.
Груевски во судот треба да се појави во понеделник на рочиштето за случајот „Титаник“, и доколку не се пријави во затворот или не биде стражарно приведен, постои можност и тогаш да му биде врачено решението.