Европската унија по непостигнувањето договор за формирање влада меѓу ВМРО-ДПМНЕ како победничка партија на последните избори и ДУИ, објави дека сега очекува претседателот Ѓорге Иванов да изврши итна консултација со политичките сили во земјата и да определи лидер за формирање на „што е можно поширока влада“, јавува дописникот на МИА од Брисел.
Ова денеска на прес-конференција во Европската комисија го соопшти портпаролката на неформалната Влада на ЕУ, Маја Коцијанчич, која во име на официјален Брисел, уште еднаш предупреди дека „земјата нема време за губење“.
– Ние забележавме дека се уште не е постигнат договор за формирање нова Влада и затоа ги повикуваме сите политички актери во земјата, вклучително и претседателот, да делуваат на смирен и конструктивен начин со целосна одговорност за решавање на сегашната состојба. Знаете дека земјата нема време за губење и во овој поглед очекуваме претседателот, според Уставот, да изврши итна отворена консултација со политичките сили во земјата и брзо да определи лидер за формирање на Влада, кој ќе може да најде заедничко тло за формирање на стабилна, солидна и одговорна коалиција, истакна Коцијанчич.
Гласноговорничката на Еврокомисијата појасни уште еднаш кои се очекувањата на ЕУ во однос на тоа како тие би сакале да изгледа новата македонска Влада:
– Како што кажавме претходно, таква коалиција треба да биде што е можно поширока и да се потпира на силен, инклузивен реформски консензус и меѓуетничка соработка. А, како што добро знаете, ние очекуваме од идната Влада и од сите политички сили во земјата да продолжат со имплементирање на договорот од Пржино и решавање на Итните реформски приоритети, бидејќи сето ова е витално за понатамошен прогрес на земјата на патот кон европските интеграции и ова е нешто на што сите политички партии се обврзаа, а и истото го очекуваат и граѓаните, додаде Маја Коцијанчич.