Објавувачот на прислушуваните разговори познат во јавноста како Ел Чека ги повика лидерите на двете опозициски партии – Алијансата за Албанците и Беса, да се приклучат на протестот во Скопје, кој како што вели тој е закажан за 26 јули пред Владата. Ел Чека во повеќе статуси на „Фејсбук“ бара Зијадин Села и Билал Касами да излезат заедно со народот, бидејќи дошло време како што вели народот да ги искористи партиите, и тие според него како опозиција требало „глава до глава“ со граѓаните да бидат на улица. „Орелот има две глави но едно тело ,тоа е пример за вас и за сите оние кои се чувствуваат како Албанци“ пишува Ел Чека.
Села и Касами не кажуваат конкретно дали ќе одговорат на повикот на Ел Чека. Лидерот на Алијансата за Албанците , вели дека тие се посебна партија со своја програма, а од Беса велат дека ќе донесат одлука во партиските органи.