За коментарите на дел од јавноста зошто функционерите во Владата примале вакцини без соодветна старосна граница, пред хронично болните, премиерот Зоран Заев вели дека тие се вакцинираат кога веќе во државата има доволни количини за масовна имунизација. Според Заев, со неговата вакцинација, како и имунизирањето на министрите во наредните денови, се испраќа порака до граѓаните и тие да се заштитат од коронавирусот и да се пријават на vakcinacija.mk.
„Е пустото, прво беше зошто не одите први да пратите порака. Го чекавме редот, а тоа е кога ќе дојдат доволни количини за масовна вакцинација. Само преку вакцинација може да го победиме ова светско зло. Пред се гледаме таму кај нашите повозрасни родители, пријател и тн. Немам време дали се осеќам поинаку, а се осеќам одлично, добро, препорачувам вакцинација со таа вакцина која ќе дојде во ред. Така е исправно, сите вакцини се добри и потврдени. Предизвикуваат имунитет. Верувам дека брзо сите, почитувајќи го редот, ќе бидеме имунизирани“, рече Заев.
По премиерот Зоран Заев, се вакцинираше и министерот Венко Филипче. И тој по вакцинацијата кажа дека се чувствува добро. Филипче, како и Заев, ја примија вакцината на „Синофарм“. Термини за вакцина во следните 14 дена добиле и сите останати министри.