ДУИ најави дека ќе достави амандмани на предлог- законот за обвинителство и законот за Совет на обвинители кои денеска влегоа во собраниска процедура. Пратеникот од ДУИ, Артан Груби рече дека дел од амандманите се поврзани со употребата на албанскиот јазик, а дел се однесуваат на изборот на обвинители во Советот, да се спроведе со бадентерово мнозинство.
Според Груби законот за обвинителството е есенцијален закон што доаѓа во собраниска процедура во жалосни околности, единствено поради алчноста на одредени лица.
„И кај мене како и кај другите граѓани има чувство на огорченост и разочараност. Се наметнува повторно потребата од ветинг за судии, обвинители и сите јавни функционери. Се надевам ќе се донесе консензуално, со компромис меѓу партиите“, рече Груби.
Тој како претседател на Комисијата за европски прашања, која е матична за предлог законот за обвинителството, рече дека ќе се консултира со сите партии колку време им е потребно за да ги достават амандманите и потоа ќе закаже седница, најверојатно во текот на идната недела.
