Општинскиот кризен штаб во Битола донесе одлука од денеска дотурот на стока со возила кои влегуваат во градот да се врши само во претпладневните часови.
Од Општина Битола најавија оперативна програма со засилена активност на локалните јавни претпријатија на терен, дезинфекција и чистење на јавните површини во градот.
–Јавните претпријатија со оперативни планови ги продолжуваат превентивните мерки. ЈП Комуналец и ЈКП Водовод продолжуваат со интензивно чистење, миење и дезинфицирање на јавните површини и јавните објекти, а ЈП Пазари и КЈП Нискоградба се задолжени за дезинфекција на пазарите, одржување на дезинфекциските корита и, освен досегашното дезинфицирање на возилата коишто имаа дотур на стока во пазарот, дополнително ќе вршат дезинфицирање на сите возила на влез во градот, информираат од локалната самоуправа.
Заклучно со вчерашниот ден, во Битола се регистирани 229 лица со решенија за изолација и 41 лице со потпишана изјава во домашна изолација. Во двата државни карантина во овој град сместени се 146 лица.
Инфекција од КОВИД-19 е регистрирана кај шест битолчани.