Хирургот Ѓорѓи Јота, кој вчера беше прегазен од возило управувано од 16-годишник без возачка дозвола на улицата „Водњанска“ пред Клиничкиот центар во Скопје, има тешка повреда на главата, потврди министерот за здравство Венко Филипче.
„Попладнево бев на увид и поразговарав со докторите кои будно ја следат неговата состојба. Верувам дека ќе се избори и ќе закрепне иако повредата е многу сериозна, напиша вечерва Филипче на Фејсбук.
Во одговор на новинарско прашање околу состојбата на Јота, министерот претходно соопшти дека Јота има нагмечување на мозокот и на белите дробови, поставен е на респираторна машина и дека се преземаат сите мерки на интензивно лекување.
– Вчера во текот на ноќта ме консултираа. Колегата доктор Јота има тешка повреда на главата и се наоѓа во одделот за интензивно лекување на ТОАРИЛУЦ,“ изјави Филипче.
