Долгогодишната традиција на џаламарството во Тиквешијата продолжи и денеска, џаламарите со страшни маски и клопотарци со кои прават врева ги избркаа лошите духови во неколку кавадаречки села – Сопот, Дреново, Бегниште, Ресава.
На симболичен начин тие ги ипсратија пораките за плодна година. Претседателот на кавадаречкиот општински Совет Илија Тренчев денеска ги посети џаламарите од селата Сопот и Дреново и наздрави со чашка греана ракија.
– Како што тече оваа ракија во чашите и во нашите усти така да тече со лесно пласманот на земјоделските производи во Тиквешијата, посакаа џаламарите.
Тренчев изјави дека општината отсекогаш ја почитувала и ќе ја почитува традицијата.
– Прекрасно е да се биде дел од овие традиционални верувања на населението. Традицијата е она по што се разликуваме од другите. Таа е нашето минато, сегашноста и иднината, рече тој.