Министерот за надворешни работи Никола Димитров денеска на Блед на состанокот на Процесот за соработка во Југоисточна Европа посочи дека Македонија е пример како не треба да се спроведува процесот на проширување на ЕУ.
– На Македонија може да се научи лекцијата што не треба да му се прави на Западен Балкан. Потпишавме спогодба во 2001 година, станавме кандидат пред 12 години и сите успеси од тогаш се игнорирани поради политичкиот проблем со една земја-членка на ЕУ. Потоа дојде до запирање на реформите и ескалација во која граѓаните влегоа во Собранието. Тоа е тоа што може да и се случи на една земја кога нема перспектива, рече Димитров.
Како што јави ТАНЈУГ, шефот на македонската дипломатија нагласи дека Македонија е и пример што ќе се случи кога ќе се „омекне“ извештајот за напредокот на државата, кога нема доволно искреност и еволуција на состојбата, како и кога една земја ќе ги запре реформите.
– Македонија отсекогаш е на вистинската страна во историјата, а во последните три години успеавме само да направиме хаос. Затоа апелирам земјите-кандидати за ЕУ, реформите да ги сфатат сериозно, а пак земјите-членки кон проширувањето да гледаат сериозно, истакна Димитров.