Дипломатскиот кор во Словачка го посети градот Нитра, некогашен центар на Великоморавското царство, каде што светите Кирил и Методиј, повикани од кнезот Растислав, ја реализирале дипломатско-црковната мисија иницирајќи служење на светите литургии на старословенски јазик.
Годинашната дипломатска екскурзија организирана од Министерството за европски и меѓународни работи на Словачка се совпадна со Денот на светите Кирил и Методиј. На настанот присуствуваше и амбасадорот на Македонија во Словачка Ѓорѓи Филипов.
– Во катедралата „Св. Емерам“, првата христијанска црква во Централна и источна Европа, за значењето на градот и регионот Нитра говореше градоначалникот Јосеф Двонч. Тој потсети на зборовите на папата Јован Павле Втори, кој во 1995 ја посети Нитра, велејќи дека веднаш по доаѓањето на Кирил и Методиј тука била основана првата диоцеза меѓу словенските народи. Папата тогаш рекол дека тоа е подарок што никогаш не смее да се заборави, соопшти Амбасадата на Македонија.
Заменик-премиерот и МНР на Словачка Мирослав Лајчак им се обрати на дипломатите и нагласи дека Нитра е еден од осумте региони на Словачка, кој со неговото историско, црковно и образовно значење претставува центар од каде се распространило христијанството и писменоста меѓу словенските народи.