Претседателот на Собранието, Талат Џафери, одби да ја продолжи денешната седница на која се расправа за уставните измени и по 18 часот. Предлогот го достави координаторот на ВМРО-ДПМНЕ, Драган Данев, со образложение дека дебатата е значајна.
„Илија (Димовски) се смееш, но на координаторот да му кажеш дека пратеник не може да бара продолжение на времето на седницата. 20 пратеника може да бараат итна седница, 30 пратеника може за пристапување на уставни измени… но, индивидуално пратеник не може да бара продолжување на работно време на Собранието. Претседателот одлучува според деловникот“, рече Џафери.
Претходно тој го одби барањето на ВМРО-ДПМНЕ, Христијан Мицкоски да се обрати на собраниска говорница бидејќи не е пратеник, а собраниските служби го вратиле барањето со образложение дека е адресирано до господин Џафери, а не до претседателот на Собранието.