Какво е минатото на Јовица Стефановиќ, познат како газда Нини од чија изјава ќе зависи целиот судски процес на премиерот Никола Груевски против лидерот на опозцијата Зоран Заев? Судот не дозволи да се појави како сведок Ден Дончев, еден од гласовите на снимениот материјал, иако тој изрази подготвеност да сведочи. Судот таков став немаше и за газда Нини, кој изјави дека не се слушнал никогаш со Никола Груевски.
Јовица Стефановиќ, кој сега испадна дека е клучен сведок, има долга историја на приведувања, притвори, судски процеси и матни зделки. Српските медиуми во јуни годинава известија за афера во Зрењанин во која обвинителството истражувало дали Јовица Стефановиќ Нини во магацин на печатница под стечај сокрил два тона парацетамол од “Срболек“.
Пред година и пол српската полиција го уапси Јовица Стефановиќ Нини, заедно со директорот во „Југормедија“, Златко Марковиќ и директорката на компанијата „Нини“ од Ниш, чиј сопственик е исто така газда Нини, заради сомнение дека ја злоупотребиле службената положба и ја оштетиле компанијата „Југоремедија“ за 7 и пол милиони евра.
Газда Нини е апсен и во 2010 година заради сомнение дека проневерил 5 милиони евра од “Срболек“.
Тој се нашол и на меѓународна потерница кога беше осомничен дека еден директор на банка во Ниш го терал да му помогне да го откупи мнозинскиот капитал во таа банка.
Јовица Стефановиќ познат како Газда Нини за прв пат во Македонија доаѓа во 1998 година. Истовремено, во Србија тој е вмешан во афера со Тутунската индустрија Ниш. Во Македонија, Нини ја купува фабриката за лекови „Јака 80“ од Радовиш, а потоа и „Радо банка“, „Ветфарм трејд“, и „Македонска банка“.
Стефановиќ во српската јавност е познат како бизнис партнер на Предраг Ранковиќ Пецони и како сопственик на фирмите „МД Нини“, „Нишка пивара“, „Луксол“, „Житопромет“, „Просвета“, новосадската фирма „Ветпром“ и „Југормедија“ во Зрењанин.
Двете банки кои ги купи Нини – „Радо банк“, и „Македонска банка“, завршија со ликвидација.