Претседателот на СДСМ, Бранко Црвенковски денеска имаше средба со известувачот на Европскиот парламент за Република Македонија Ричард Ховит, соопштуваат од партијата.
На средбата, главен акцент е ставен на последниот Извештај на Европската комисија за напредокот на Република Македонија, неодамнешниот „Меморандум за разбирање“ инициран од страна на Атина и сигналите кои до нив ги испраќа македонската Влада преку својот одговор, како и за очекувањата од декемврискиот самит на ЕУ.
„Црвенковски истакнал дека доколку во декември Македонија добие датум за преговори со ЕУ, позитивниот извештај ќе ја добие својата вистинска смисла, а во спротивно Македонија ќе се најде во веќе видена ситуација. Известувачот на ЕП за Република Македонија, Ховит ги повтори своите заложби и потсети за личните напори вложени во процесот на изнаоѓање на компромисни решенија, со цел решавање на спорот со соседна Грција и со тоа конечно почнување на пристапните преговори на Македонија со Европската Унија.
– На крајот на средбата двајцата соговорници заклучија дека исходот од Самитот на ЕУ кој ќе се одржи во декември е од исклучително значење за иднината на Македонија, гледано во најширока смисла. Дека од него ќе зависат движењата, развитокот и позиционирањето на земјата како во рамки на меѓународните односи, така уште повеќе и на внатрешен, а пред се меѓуетнички и политички план, стои во соопштението од Центарот за комуникација на СДСМ.
