Претседателот на Владата Зоран Заев денеска упати честитка до албанскиот премиер Еди Рама за победата на парламентарните избори.
– Демократските избори во Република Албанија ја покажуваат определеноста на граѓаните на Албанија кон почитување на европските вредности, кои се иднината на државата, но и на целиот регион. Убеден сум дека ќе продолжи Вашата посветеност кон демократските и реформските процеси, според стандардите на ЕУ и НАТО, наведува Заев во честитката.
Верувам, додава Заев, дека ќе продолжи и пријателската и принципиелна соработка меѓу Република Македонија и Република Албанија преку меѓусебно почитување, разбирање и поддршка, во интерес на обезбедување квалитетен живот за граѓаните на нашите две држави, како и за развојот на стабилноста на Балканот во целина.
– Перспективите на државите од Југоисточна Европа се во Европската унија и во НАТО и со одлучноста што ја покажуваме како одговорни политичари, уверен сум дека ќе ги осигураме посакуваните и потребните европски интеграции за граѓаните на нашите држави и на регионот, напиша премиерот на Република Македонија, Зоран Заев во честитката до премиерот на Република Албанија Еди Рама.
