Претседателот Ѓорге Иванов по повод големиот муслимански празник Бајрам, упати честитка до поглаварот на Исламската верска заедница во Република Македонија, Реис-ул-улема Сулејман Реџепи, до членовите на Ријасетот на ИВЗ и до сите припадници на исламската вероисповед во Република Македонија.
– На сите верници од исламска вероисповед им посакувам овие денови на празнување да ги минат исполнети со добрина, милосрдие, разбирање и љубов, вредности кои ги зближуваат и ги поврзуваат и луѓето и религиите. Убеден сум дека сите заедно ќе продолжиме да ги унапредуваме меѓусебните односи и меѓусебното разбирање, градејќи благородни дела. Токму затоа традицијата, години наназад, говори за заемната меѓусебна почит и за солидарноста, независно од верската и етничката припадност како завет за идните млади генерации, се вели во честитката од Иванов.
Заемното почитување и славењето на празниците на различните верски заедници во земјава, како што подвлекува претседателот, се столб на соработка и соживот. – Тие се поттик за меѓусебно почитување и разбирање, вредности кон кои се стремиме, но и заеднички треба да ги негуваме, додава Иванов.
Честитајќи го големиот исламски празник Рамазан-бајрам, претседателот Иванов, им посакува пријатни празнични денови исполнети со мир и благосостојба.