Неосновани, неточни и целосно паушални се обвинувањата дека Цементарница УСЈЕ АД Скопје е „најверојатно најголем индустриски загадувач“ во Скопје. Ова паушално тврдење без никакви докази е крајно несериозно и не служи никому, а најмалку оди во прилог на решавање на состојбите со амбиенталниот воздух во градот.
Секоја година во текот на зимските месеци, УСЈЕ е неосновано напаѓан од страна на политички партии, невладини организации и други ентитети без никакви аргументи. Ние разбираме дека во отсуство на било каква акција од страна на сите релевантни страни најлесно е да се обвини компанијата и на тој начин да се дефокусира јавност од вистинските проблеми и можните решенија. Сепак од сите чинители и институции кои претендираат да бидат сериозни и темелни во својот пристап кон предизвиците и можните решенија очекуваме темелен, експертски и издржан пристап наместо популизам кој не води до изнаоѓање на решенија, се вели во реакцијата на Цементарница УСЈЕ.
Од компанијата додаваат дека УЈСЕ како одговорна компанија е отворена за соработка со сите заинтересирани страни, а секој граѓанин, организација или институција може да ја посети компанијата и да ги добие сите релевантни податоци. Покрај тоа, УЈСЕ е единствена компанија во земјата која редовно ги испраќа податоците од мерењата до сите медиуми и невладини организации, меѓу која и организацијата која изнесува паушални и неосновани тврдења. Овие податоци ја покажуваат фактичката состојба.
Иако многу пати сме ги изнеле фактите, во интерес на јавноста ќе потсетиме дека:
„УСЈЕ има Интегрирана еколошка А дозвола, издадена од Министерството за животна средина и просторно планирање. Согласно оваа дозвола УСЈЕ има обврска да врши 24 часовен мониторинг на индустриските емисии. За таа цел имаме инсталирано систем од германскиот производител SICK, кој е калибриран и контролиран од овластени независни надворешни компании на сите точки кои се точно утврдени од надлежните институции.
• Се прават дополнителни контролни мерења што ги вршат независни лаборатории, а резултатите од овие мерења повторно потврдуваат дека нема отстапки од законски дозволените лимити.
• Компанијата ги користи најдобрите достапни техники во производството и технологијата која се применува во УСЈЕ е идентична со било кога друга цементарница во ЕУ.
• УСЈЕ е единствен индустриски капацитет во државата со високо ефикасен комплексен систем на вреќесто филтрирање, каде во еден филтер има по најмалку 3000 вреќи кои ја запираат прашината и други емисии и ги враќаат во производниот процес, како составен дел од финалниот производ. Производствен процес при кој материјалот има температура од 1500 C°, а температурата на пламенот е 2000 C° и оксидациони услови на кои, според хемиска закономерност, нема опасни емисиони остатоци.
• Цементарница Усје има дозвола за користење на алтернативни горива од 2013 година, а оваа дозвола се однесува на користење на не опасни фракции од отпад, како што се лушпи од ориз, кафе, текстил, хартија, картон и композитни материјали. УСЈЕ е единствена компанија која инвестирала во технологија која може како гориво безопасно да користи оризова арпа, ткаенини и друго. Истите сега се спалуваат по полињата во државата или непрописно се депонираат. Користењето на овие алтернативни горива во моментот е околу 5% од вкупната количина на енергенси кои се користат во компанијата.
• Користењето на отпад и преработки од отпад како алтернативно гориво во цементната индустрија е светски потврдена праска коjа се применува повеќе од 50 години во ЕУ и САД. Во моментот над 40% од енергенсите што се користат во цементната индустрија во ЕУ доаѓаат од алтернативни горива кои потекнуваат од отпад. Имено печките во цементарницата работат на температура од над 1500 C°, каде има целосно согорување и овој процес е целосно безбеден за животната и работната средина и за пошироката заедница.
Ги повикуваме сите засегнати страни да го напуштат принципот на неосновано напаѓање на одреден субјект, а наместо тоа да се фокусираат на конструктивни решенија. УСЈЕ останува посветен и одговорен субјект и ги повикува сите заинтересирани страни да ја посетат компанијата и да се запознаат со сите процеси кои се одвиваат во неа“, се вели во реакцијата на компанијата.