Концерт на женскиот камерен хор „Св. Злата Мегленска“ по повод денот на Христовото раѓање, ќе се одржи утревечер во Соборниот храм „Св. Климент Охридски“, со почеток од 20 часот.
Концертот е во рамки на манифестацијата „Божиќни свечености“ и традиционално се одржува секоја година со благослов на архепископот охридски и македонски г.г. Стефан.
Хорот, кој е под диригентско водство на Летка Димовска-Полизова, ќе изведе дела од домашна и од руска литература. Гостуваат битолскиот женски хор „Бутелион“, со кој раководи диригентката Лилјана Трајковска, женскиот хор „Рустико“ под водство на маестро Запро Запров и детскиот архиепископски хор „Херувими“.
Божиќниот концерт е во организација на Здружението на камерни хорски состави „Света Злата Мегленска“ во кое членува и истоимениот хор и на Македонската православна црква со поддршка од Министерството за култура и МРТВ.
Хорот „Света Злата Мегленска“ е составен од 20 женски вокали, од кои повеќето се млади академски образовани музичари и студенти на Факултетот за музичка уметност во Скопје. Иако волонтери според ангажманот, тие со својот професионален однос придонесуваат за афирмација на македонската културна традиција, како и за популаризација на хорското црковно пеење на автентичен начин и со висок квалитет.
Свечена беседа ќе одржи македонскиот писател Васе Манчев. Солисти на вечерта се: Николина Јаневска, Јасмина Димитровска, Јулија Карамитрова-Огненовска, Елена Тасевска и Андријана Јаневска.