Во интерес на Бугарија е Република Македонија да биде стабилна, единствена, независна држава со јасна евроатлантска перспектива, која поминува низ зближувањето на двете земји и откажувањето од антибугарската реторика, која се случуваше последните неколку децении.
Ова го истакнува бугарскиот премиер Бојко Борисов во одговор на писмо на претседателот на опозицискара Бугарска социјалистичка партија Корнелија Нинова во однос на договорот за пријателство, соработка и добрососедство со Република Македонија, соопшти прес-службата на Бугарската влада, пренесува БТА.
– На наша иницијатива, ситуацијата со текот на преговорите за предлог – договорот, како и самиот предлог – договор беше претставен и детално објаснет на седница на Комисијата за надворешна политика на Народното собрание на 5 јули, 2017 година поради финализирање на конечниот текст на договорот, посочува Борисов. Тој додава дека тоа е без преседан, бидејќи според Уставот на земјата, Народното собрание се запознава со текстот на договорот веднаш по неговото потпишување, кога ќе дојде на ратификација во Парламентот.
Борисов меѓу другото истакнува дека преговорите со Република Македонија за склучување на договорот за пријателство, соработка и добрососедство се водат интензивно од 2008 година и оти до овој момент се реализирани 11 круга на преговори на експертско ниво, а повеќе пати договорот бил разгледуван и на ниво на министри за надворешни работи, односно премиери.
– Во сите тие години, независно од политичката припадност на владата, која ги водела преговорите, бугарската страна во континуитет опстојувала на едни и исти позиции во бугарски интерес, вели Борисов.
Тој додава дека целта на договорот е освен реафирмација на Заедничката декларација потпишана во 1999 година од Владата на Иван Костов, двете земји да ги унапредат своите односи и да го потврдат својот политички ангажман во меѓународноправен документ.