Уредникот во телевизија Алфа, Зоран Бојаровски, на конференцијата за подобрување на сорабтоката меѓу новинарите и граѓанските организации за промоција на човекови права преку совети објасни што недостасува во механизмите за соработка меѓу нив.
– Не е доволно граѓанските организации да испратат билтен или соопштение до медиумите. Обидете се она што е вредно да го направите преку настан кој ќе ги привлече медиумите. Потребни се дополнителни напори за да се привлече вниманието, рече Бојаровски.
Тој укажа дека новинарите знаат се, а всушност тоа е површно знаење.
– Се помалку во медиумите постојат експерти од новинарски аспект. Кога ќе исчезнат тие, ќе имаме работа со сезнајковци. Затоа, на новинарите им требаат дополнителни информации, а граѓанските организации треба да им ја овозможат таа помош, истакна уредникот во ТВ Алфа.
Покрај тоа, на граѓанските организации им укажа да внимаваат на јазикот кој го користат, бидејќи тој најчесто е стручен и може да предизвика проблеми на новинарите.
Елена Георгиевска – Јасна Атанасова
