Кандидатот за градоначалник на Карпош од СДСМ Стефан Богоев, истакна дека Карпош веќе неколку години е „општина киднапирана од лажни ветувања и од урбаната мафија“.
– Ни ги одземаа парковите не загушија во отровен воздух, ни го одземаа маалскиот живот. На сево ова ќе им возвратиме со контра удар и тоа силен и неприкосновен. Ќе им возвратиме со целосен попис на зеленилото и негова заштита, со многу маалски зелени скверови и пракчиња, ќе возвратиме со огромен модерен зелен и убав парк по должината реката Вардар кај Карпош 4 кој ќе обезбеди здрав живот, чист воздух и маалска дружба за идните генерации, рече Богоев.
Тој истакна дека училишните дворови ќе ги претвори во зони за рекреација и фитнес, а ќе ја обнови и салата Партизан, како и турнирот Сокол по кој Карпош еден некогаш се паметел.
Најави и изградба на три нови реонски базени на територија на општина Карпош, како и бесплатни домашни лекарски прегледи за повозрасни граѓани, пензионерски клубови, додека во Злокуќани на кејот на Вардар, како што рече, ќе се изгради и ултра модерен дом за возрасни лица, како и центар за рекреација на постарите.
