Блокирањето од советниците не ме спречува мене како градоначалник и јас ќе продолжам да работам, порача Данела Арсовска пред седницата на Советот на Град Скопје, обвинувајќи ги дека неколку месеци ги блокираат одлуките со кои им се скратуваат права на граѓаните.
– Ова блокирање поради инаетот на партиските лидери кои ги саботираат процесите во Скопје, не овозможува граѓаните да ги добијат своите права. Граѓаните треба да знаат дека Скопје има оперативен од околу 70 милиони евра, додека метрополите од регионот почнувајќи од Белград имаат над една милијарда евра буџет. Тие можат да прават и чуда, но јас сметам дека со премногу мал Буџет и премногу ниско ниво на децентрализација и сепак го даваме нашиот максимум и правиме чуда во Скопје среде енергетска криза- истакна градоначалничката.
Арсовска рече дека советниците треба да се вклучат во целиот процес на набавки на нови автобуси и да одлучуваат за граѓаните, но малку побрзо за да почнат процесите во Скопје.
– Влегуваме во четвртиот месец од годината, а нема одлуки. Како Градот да носи одлуки и да постапува кога Советот на Градот четири месеци не носи одлуки. Граѓаните не можат да набават велосипеди со субвенции, не можат да го користат правото на алтернативен начин на греење. Апелирам до советниците да ги надминат партиските интереси – рече Арсовска.
