Владата на Република Македонија на последната седница донесе одлука Министерството за внатрешни работи да го зголеми присуството на терен во сите засегнати опожарени подрачја, да продолжи континуираното гасење и локализација на активните пожари, како и овозможување услови за делување на АРМ, активно вклучена на теренот.
Исто така, ЈП Македонски шуми треба непрекинато да ја информира Дирекцијата за заштита и спасување за сите новонастанати состојби на терен и соодветно на развојот на настаните на терен.
За време на седницата, Владата, како што е наведено во соопштението од прес-службата, го задолжи Управувачкиот комитет за координација и управување на системот за управување со кризи да донесат итни заклучоци и мерки за засилено делување на сите надлежни институции, како и единиците на локалната самоуправа во насока на справување со сите активни пожари на територијата на Република Македонија.
Во состав на Управувачкиот комитет се министрите за внатрешни работи и за одбрана Оливер Спасовски и Радмила Шекеринска, за транспорт и врски Горан Сугарески, за земјоделство, шумарство и водостопанство Љупчо Николовски и министерката за труд и социјална политика Мила Царовска, како и претседателот на ЦУК, Агрон Буџаку, претставници на АРМ, претставник од кабинетот на претседателот Ѓорге Иванов и претставници од ЈП Македонски шуми и УХМР.
За времено решавање на проблемот со депонијата во Струга, Владата на Република Македонија донесе одлука да издвои 12.000.000 денари од резервите на Буџетот за да бидат наменети за компресирање и транспорт на сметот од депонијата во Струга на друга локација.