Државната комисија за спречување на корупцијата на денешната седница го одби приговорот за разрешување на поранешниот вршител на должност директор на „Јасен“ Оливер Андонов како неоснован. Исто така, Комисијата донесе ваква одлука и за приговорот на Лидија Богдановска, поранешен в.д. директор на Службата за просторен информативен систем, орган при Министерството за животна средина во Битола.
Приговорите на двајцата поранешни вршители на должност беа одбиени поради тоа што одлуките за нивно разрешување биле донесени пред денот на распишувањето на локалните избори.
Оливер Андонов по седницата изјави дека одлуката за негово разрешување стапила на сила и му била врачена на 11 август. Претседателот на Антикорупциска, Игор Тантуровски, пак, во образложението на овој предмет кажа дека одлуката за разрешување на Андонов била донесена од страна на Управниот одбор на „Јасен“ на 5 август.
Тантуровски ги информираше новинарите дека се уште не се пристигнати одговори и документи во врска со веќе отворените случаи за разрешувања, дисциплински постапки и откази по распишувањето на локалните избори 2017 што е во спротивност со Изборниот законик.
