„За само десетина дена, над 5.500 граѓани ѝ се приклучија на групната иницијатива за оспорување на уставноста на законите за хонорарците.
Целта на оваа акција е иницијативата да биде достапна за секој граѓанин. Поради ова, но и поради големиот интерес на граѓаните за приклучување, АЈДЕ! – Платформата за граѓанска политика ја продолжува акцијата до четврток, 9 април 2015.
Во Скопје, единствен пункт за приклучување ќе биде ГЕМ клубот, во Старата скопска чаршија, а низ државата ќе продолжат да функционираат 13-те пунктови[1] во Битола, Кратово/Крива Паланка, Дебар, Тетово, Штип, Прилеп, Струга, Струмица, Делчево, Куманово, Берово и Кавадарци.
Големиот интерес на граѓаните покажа дека тие се спротивставуваат на законите со кои се прекршува уставното право на еднаквост и на работа, како и принципот на владеење на правото и забраната за повратно дејство на законите“, се вели во соопштението на АЈДЕ!.