Директорот на Агенцијата за филм во 2021 година исплаќал хонорари од 15 до 60.000 денари за рецезенти кои чија работа не била предвидена со деловникот, а немало ниту критериум за нивното именување, покажа ревизијата на Државниот завод за ревизија.
„За вршење на работи од надлежност на Агенцијата, согласно член 18 став 2 од Законот за филмска дејност директорот на Агенцијата формира филмски совет, именува рецензенти, советници и други надворешни соработници. Во однос на нивното именување и активностите по конкурсот за финансирање на проекти за производство на долгометражен и краткометражен игран, документиран и анимиран филм за 2021 година го констатиравме следното:
– Согласно член 20 од Статутот, Агенцијата има донесено деловник за работа на филмскиот совет, но не е спроведена постапка за предлагање и донесување на деловник за работа на филмските рецензенти и деловник за работа на финансиските советници и тоа во рок од 30 дена од изборот, како што е предвидено во член 23 од Статутот на Агенцијата, донесен во февруари 2014
година.
– Именувањето на филмските рецензенти, потребните квалификации кои истите треба да ги поседуваат согласно видот на проектот, рокот за изработка на рецензијата, број на рецензии за кои се ангажира истиот и висината на надоместокот согласно видот на проектот и степенот на ангажираност не е уреден со одредбите од ЗФД или со интерен акт на Агенцијата.
Директорот на Агенцијата за 2021 година именувал 5 филмски рецензенти за двата рока на одлучување кои биле ангажирани со различна динамика и на кои им биле исплатени надоместоци во различен износ кои се движеле од 15 до 60 илјади денари на месечно ниво“, стои во извештајот на ревизорите.