Претседателот на Демократската унија за интеграција Али Ахмети, денеска во Тетово се сретна со генералниот секретар за надворешна политика на Европската унија и поранешен амбасадор на ЕУ во Македонија Ален Ле Роа, заедно со францускиот амбасадор во Скопје Кристијан Тимоние.
Ахмети, како што соопшти прес-службата на ДУИ, истакнал дека Париз, Лондон, Берлин, Рим, Брисел, Вашингтон како и целата меѓународна заедница го поддржува успешното заокружување на нашиот евроатлански пат.
– Ле Роа е пријател на Македонија и на регионот и затоа се враќа повторно после повеќе од една деценија за да не повика да станеме членка на НАТО и ЕУ поминувајќи го успешно предизвикот на референдумот и уставните измени, истакна Ахмети.
Изрази убедување дека граѓаните позитивно ќе се изјаснат на референдумот на 30 септември.
ДУИ ги презема сите подготовки за успех и прослава на 30 септември, бидејќи ги остваруваме двата последни чекори од нашиот тридецениски маратон за членство во НАТО и ЕУ, се додава во соопштението од партијата.
Ахмети и Ле Роа дискутираа и за состојбата во регионот во пресрет на напорите за конечно стабилизирање и нормализирање на односите меѓу Приштина и Белград.