Основниот суд Скопје 2 донел решение со кое што на 1ТВ ѝ обезбедува основа за 100 илјади евра побарување за платен политички маркетинг. Ова значи дека 1ТВ може од ДИК да бара да ѝ исплати штета од 100 илјади евра поради тоа што во првите десет дена од кампањата телевизијата не емитувала реклами, иако телевизијата го пропушти законскиот рок од Изборниот законик и дури по истекот ги достави ценовниците до ДИК.
Ова решение го донела граѓанската судијка Сузана Дончевска на 12 април годинава.
Во правната поука на пресудата пишува дека 1ТВ може да поднесе тужба за утврдување на право на платена политичка програма, право на надомест, како и надомест на штета од испуштена корист од изборниот процес.
Основниот суд Скопје 2 е третата инстанца до која се жали телевизијата затоа што немала можност да емитува реклами за претседателската кампања. Претходно, Управниот и Вишиот управен суд, како надлежни судови за управно право веќе донесоа пресуди во корист на ДИК и ги отфрлија тужбите на 1ТВ.
На ова решение од судијката Дончевска, ДИК поднело жалба во кое пишува дека судот сторил „суштествени повреди на одредбите од парничната постапка и нецелсно ја утврдил фактичката состојба“.
Од ДИК сметаат дека Граѓанскиот суд е ненадлежен да одлучува за предлозите на тужителот, бијдејќи за тоа надлежни се само управните судови.
ДИК во жалбата навеле дека ниту дозволува, ниту забранува радиодифузерите да вршат платено политичко рекламирање и дека тоа е предмет на меѓусебен договор меѓу радиодифузерот и учесникот во изборната кампања.