Новиот јавен повик за субвенционирање на нискобуџетски авиокомпании ќе биде објавен деновиве, најави министерот за транспорт и врски Горан Сугарески, одговарајќи на новинарско прашање поврзано со укинувањето на неколку авиолинии од страна на „Визер“ која беше единствено пријавена компанија на тендерот што го поништи Владата.
– Минатата недела беше поништена постапката во делот на нискобуџетните компании бидејќи имаше пристигнато една понуда и Комисијата, врз база на пропусти, понуди решение со кое постапката е поништена. Наредните денови со информација на Влада и сите активности коишто треба да ги преземе Министерството за транспорт и врски ќе биде распишан нов јавен повик. Државата има предвидено пари за нискобуџетни компании така што стојам зад она што го кажав дека согласно владината програма оваа мерка продолжува и државата ќе субвенционира нискобуџетни компании, изјави Сугарески во Велес.
На официјалната веб страница на авиокомпанија „Визер“ од октомври веќе не може да се резервираат билети од Скопје до Барселона и од Охрид до Лондон. Билети не можат да се купат и за летовите од скопскиот аеродром до Ваксјо во Шведска по 16 септември.