Министерот за транспорт и врски Миле Јанакиески денеска на средба со генералниот секретар на Меѓународната унија за патен транспорт (ИРУ) Умберто де Прето ги претстави реализацијата и напредокот на проектите за подобрување на патната и железничката инфраструктура долж паневропски коридори 8 и 10 и обновата на возниот парк на ЈСП „Скопје“
Јанакиески, соопшти по средбата Министерството за транспорт и врски, ги презентира активностите за изградбата на автопатот на потегот Демир Капија – Смоквица и проектите за ремонт на пругите долж Коридорот 10, рехабилитацијата на железничките станици и набавката на нови дизел и електромоторни гарнитури и вагони за потребите на железницата.
Де Прето, според соопштението, ја истакнал стратешката позиција на Република Македонија во развојот на туризмот и трговијата, при што нагласил дека клучно за нивниот развој е континуираното инвестирање во инфраструктурата и ја изрази својата отвореност и поддршка во секој сегмент во сферата на транспортот.
– Генералниот секретар на Меѓународната унија за патен транспорт го поздрави начинот на кој во Република Македонија по електронски пат се врши распределбата на транспортни дозволи и изрази заинтересираност на следната распределба да испратат свој претставник кој ќе ја следи со цел претставување на истата како пример на добри практики, се вели во соопштението.
На средбата присуствуваше и директорот на Јавното сообраќајно претпријатие „Скопје“, Мишо Николов и управителот на „Македонија сообраќај – АМЕРИТ“, Златко Кочовски.