Најпознатата светска компанија за дигитално плаќање „Пејпал“ соопшти денеска дека на клиентите ќе им понуди услуга за купување, продавање и држење биткоин и други виртуелни пари што ќе можат да ги користат за плаќање во продавниците.
Услугата најпрво ќе биде достапна само за сопствениците на сметки во САД, кои ќе можат да купуваат, продаваат и држат криптовалути во своите паричници во „Пејпал“ веќе во наредните недели, а во првата половина на следната година компанијата има намера да ги понуди овие услуги на платформата за плаќање преку мобилната платформа Venmo и во некои земји.
„Пејпал“ веќе има добиено првична, условна лиценца од Одделот за финансиски услуги на државата Њујорк и во почетната фаза ќе дозволи само купување на биткоин, етереум, биткоин готовина и литекоин, се вели во соопштението.
Услугата ќе се обезбеди во соработка со Paxos Trust. Од почетокот на 2021 година, корисниците на PayPal исто така ќе можат да плаќаат со криптовалути на 26 милиони трговци во мрежата на PayPal, објави американската компанија.
Плаќањата во криптовалути преку „Пејпал“ ќе бидат порамнети во утврдени валути, како што се долари, што значи дека трговците нема да добиваат плаќања во виртуелни пари, нагласи компанијата.