Германските енергетски компании стравуваат дека складиштата за природен гас нема да успеат навреме да се наполнат до посакуваното ниво пред почетокот на зимата.
Керстин Андреа, претседателка на Германското здружение на енергетски и водоснабдителни компании, изјавила дека достигнувањето на 80 проценти исполнетост на складиштата би било многу тешко, имајќи предвид дека резервите во моментот се на околу 50 проценти.
Германската влада веќе ја намалила целта за наполнетост пред зимата од 80 на 70 проценти, но и тоа ниво се оценува како многу амбициозно.
Дополнителен проблем претставуваат високите цени на гасот, поради кои енергетските компании не купуваат доволни количества за создавање резерви.
Според германскиот енергетски сектор, состојбата на пазарот годинава била дополнително нарушена од геополитичките случувања, што влијаело врз снабдувањето и цените.
Во истиот период минатата година германските складишта биле исполнети со околу 67 проценти, што покажува дека годинава резервите биле на значително пониско ниво.
Од енергетскиот сектор било предложено државата да воведе даночни олеснувања за компаниите, со цел купувањето гас по актуелните повисоки цени да стане поисплатливо.