Министерот за економија, Крешник Бектеши истакна дека утре на владината седница ќе има мала корекција на одлуката за забрана на акции која ќе се однесува на производите на кои им поминува рокот.
– Мене ми беше важно граѓаните да не бидат во заблуда. Откако ќе бидат ставени одредени акции, граѓаните купуваат, одат дома и гледаат дека производот има рок од два дена, а тоа е дополнитлеен трошок на купувачот. Акции дополнителни од овие 10 проценти ќе бидат дозволени. Трговците можат да се промовираат себеси со дополнителни акции на веќе намалените производи од среда и тоа е во ред, се додека граѓаните добиваат поевтини производи. Не сакаме само граѓаните да бидат измамени во време на криза – потенцира Бектеши.
Тој претходно истакна дека секој потрошувач од среда ќе има можност во супермаркет да купува по означена цена која нема да може да се зголемува воопшто, додека утре на седница на Влада ќе бидат избрани производите односно 25 категории на производи кои ќе бидат намалени за 10% во однос на цената која ја имале на 1 август.
На листата се речиси сите прехранбени производи од пекарската, месната и млечната индустрија, а таа е преземен од Државниот завод за статистика и нивната методологија според тоа кои производи се трошат најмногу во нашата земја. Бектеши се надева дека во следната одлука на Владата ќе влезат и производителите на пијалоци и дистрибутерите на истите.