Министерот за транспорт и врски Миле Јанакиески денеска присуствува на „Првата балканска министерска конференција за јавно-приватни партнерства на автопати“, која се одржува во Мотовун, Хрватска.
Во рамките на оваа конференција, како што соопшти Министерството за транспорт и врски, предвидено е министерот Јанакиески да има свое обраќање, во кое ќе биде презентиран проектот за модернизација на патниот правец Скопје-Гостивар-Кичево по пат на концесија со можност за наплата на патарини.
За реализација на овој проект во тек е соработка со Меѓународната финаниска корпорација (ИФЦ), која е еден од коорганизаторите на конференцијата. Се очекува во следниот период од девет месеци ИФЦ да ги анализира сите релевантни информации кои се однесуваат на концесијата на патниот правец и да изготви техничко-сообраќајна анализа, детален финансиски модел, испитување на пазарот и препорачлива структура за имплементација, по што се очекува да биде распишан и јавен повик.
Исто така, во рамките на оваа конференција ќе биде презентирана можноста за реконструкција и модернизација по пат на концесија на патната делница Скопје-Блаце.
На министерската конференција во Мотовун присуствуваат повеќе ресорни министри и заменици за транспорт од земјите во регионот – Албанија, Босна и Херцеговина, Бугарија, Република Српска, Косово и Србија, како и претставници на најголемите меѓународни градежни компании, голем број на експерти и раководни лица во делот на јавно-приватни партнерства за развој на патната инфраструктура.