Федерацијата на фармерите на Република Македонија (ФФРМ) го поздравува чекорот на Владата за започнувањето на исплатата на субвенциите за 2012 за растително и сточарско производство, и покрај тоа што рокот за исплата според Законот за земјоделство и рурален развој е јуни 2013 година.
– На ваков начин се овозможува извршување на интензивните земјоделските активности во овој период во растителното и сточарско производство, а воедно се помага и на оштетените градинари и поледелци чии земјоделски површини беа зафатени со поплавите, велат од ФФРМ.
Членството на ФФРМ смета дека средствата во овој период се особено важни бидејќи имаат највисоки трошоци за набавка на репроматеријали во земјоделското производство и е од особена важност поради зголемување на цените на инпутите.
– Финансиската поддршка им е неопходна на фармерите за да ја задржат и подобрат конкурентноста на домашниот и странскиот пазар. Имено во текот на овој период започнува подготовката на површините, припрема на леи за производство на расад за култури кои се планираат да се садат на отворено во градинарско производство, нагласуваат од ФФРМ.