Европската Комисија го отвори вториот повик за стратешки рударски проекти, чија цел е обезбедување критични минерали за европската индустрија. Потпретседателот Стефан Сежурне нагласи дека токму овие проекти ја зголемуваат економската безбедност на ЕУ и се основа за зелената и дигиталната транзиција.
Новите апликанти ќе имаат корист од скратени постапки за дозволи и полесен пристап до финансии. Во првиот круг беа поддржани 47 проекти, главно за експлоатација на литиум, бакар и никел на европско тло.
„Со скратување на роковите од десет години на 27 месеци, со грантови и гарантирани заеми, ЕУ обезбедува невидена поддршка. Очекуваме уште поголем број стратешки проекти,“ изјави Сежурне.
Македонија, пак, подготвува нов Закон за рударство кој предвидува усогласување со европските правила. Министерката за енергетика Сања Божиновска нагласи дека ќе се обезбеди транспарентност и фер услови, додека претседателот на МАР, Диме Петровски, потсети дека модерниот живот ја зголемува потребата од минерали и одговорно рударство.
Иако државата располага со значителни резерви на бакар – со потврдени 700 илјади тони во Иловица – последната голема инвестиција во секторот датира од пред 40 години.