Цената на пченицата е реална и воопшто не треба да предизвика поскапување на лебот, изјави денеска министерот за земјоделство, шумарство и водостопанство Љупчо Димовски.
– Ако станува збор за висината на цената на пченицата, млинско-пекарскиот сектор нема доволно аргументи за поскапување на лебот во малопродажбата. Ако, пак, се имаат предвид други импути во производството на пецивата, тоа не би го дискутрал, рече Димовски по средбата со вицепремиерот за економски прашања Владимир Пешевски.
Според него, во овој момент Македонија има доволни количини лебно жито за да ги задоволи потребите на пазарот. Од годинашната реколта се откупени околу 150.000 тони.
Димовски напомена дека поскапувањето на прехранбените производи е глобален тренд. Министерството ќе ги преземе сите мерки што се во негова надлежност за да им излезе во пресрет на потрошувачите во однос на амортизирање на идното зголемување на цените.